Drg No

Member

Dec 07 2024 @ 16:55



•  Share

උන්මාදේ ッ - 9

ඇම්ඩ මොන මගුලෙ ගිහිල්ලද ඌ ෆෝන් එක වට්ටල තියෙන්නෙ. මම ඒ කතා කරපු ගෑණු කෙනාට විස්තරේ කිව්ව. ගෑණු කෙනත් හෙට උදෙන්ම ඒක ගෙනත් දෙනව කිව්ව. මගෙ නම්බරෙත් ඉල්ලගත්ත.

අටට අටහමාරට විතර ඔන්න ඇම්ඩ ආව නිකං ගමකින් ගුටි කාල හරකෙක් ඇන්න වගේ ලයින් එකේ.

"අඩෝ අඩෝ ගිමා. ෆෝන් එක උස්සල බං කවුරු හරි. වැටුනද දන්නෑ. අනේ සප් එකක් දිහංකො බං. යමන්ද ආපහු හොයන්න"

ඇම්ඩ ඔලුව ගිනි අරන් කියෝගෙන කියෝගෙන යනව.

"ඕන්නෑ ඕන්නෑ. ෆෝන් එක අහුලපු ගෑණු කෙනෙක් හෙට උදේ ගෙනත් දෙන්නං කිව්ව"

"අඩෝ ඇත්තමද? අනේ බං විහිලු නෙවේ ඈ. සිරාම නේද?"

"ඔව් මනුස්සයො. දැන් මම තමුසෙ පරක්කු ඇයි කියල බලන්න කෝල් එකක් ගත්ත. ෆෝන් එක ආන්ස්වර් කලේ වෙන ගෑනු කෙනෙක්. මගෙ නම්බරේ ඉල්ලගත්ත. උදේට කෝල් එකක් දෙන්නං කිව්ව"

"අනේ උඹනං දෙයියෙක් බං"
කියාගෙන මේ පරය මාව ඉඹින්න ගත්ත.

මෝලයි මායි දෙන්නම එකතු වෙලා යන්තන් ඌව සෙට්ල් ඩවුන් කලේ.

පස්සෙ රෑ වෙලා අපි සෙට් එකම නිදාගත්ත. නාලකය නං එන්නෑනෙ. ඌ වැඩට ගියා. ආපහු මෑන් එන්නෙ හෙට උදේට තමා.

ඇම්ඩට නින්ද යන්නෙත් නෑ. ඌ ඇඳ උඩ පෙරලි පෙරලි ඉන්නව , ඇඳෙන් නිකං යාල්දේවියේ කෝච්චි පෙට්ටියක වගේ සද්දෙ එනව.

අමාරුවෙන් නිදාගෙන ඉඳල රෑ මැද්දෙ නාගසලං වෙන්නම කෙල උනේ ඇම්ඩගෙ මහා කෑගැහිල්ලට. උගෙ අර ලොලු මාම අදත් උට අතවර කරන්න ගිහිල්ලද කොහෙද.

මමයි මෝලයි සැනික නැගිටල ඇම්ඩව නැගිට්ටුව. අල්ලපු කාමරේ සංක අයියා එහා පැත්තෙ ඉඳන් කෑගහනව ඇහුන.

"අනේ ඕයි නිදාගන්න දිහං. රෑ මැද්දෙ කෑගහන්න එපා"

ඌ දන්නෑනෙ අපේ කාමරේ සිටුවේශන් එක මේ වෙලාවෙ. යක්කු පෙරේතයො කුම්භාන්ඩයො එක්ක ගහන ගේමක් මේක. යෝ යෝ.... හිච්චි ගෝස්ට් හන්ටර්ස්.

ඇම්ඩට වතුර එකකුත් දීල මූණත් හෝදගනින් කියල මම ආපහු නිදාගත්ත.

පහුවදා උදෙන්ම එලාම් එකේ කුකුළ කෑ ගහන්න කලින්ම රිගින්ටෝන් එකේ කපුටා කෑගැහුව.

'තාරුණ්‍යේ මේ උන්මාදේ.....'

"හෙලෝ"

"ආ මිස්ටර් මම අර ඊයෙ ෆෝන් එක අහුලපු කෙනා කතා කරන්නෙ. මම දැන් එනගමන් ඉන්නෙ. මිස්ටර්ට පුලුවන් නං පාර අයිනෙන් වගේ ඉන්නවද?"

"ආ හරි හරි. මම එන්නං. අර අතුරු පාරෙන් දාල එන්න. හරිනෙ"

"ඕකේ"

ඇම්ඩව ඇහැරවන්න ගියෙ නෑ මං. උට මේ දවස් වල ප්‍රශ්න වැඩී. උගෙ මාම එහෙන් අතවර කරනව , ෆෝන් එක නැතිවෙලා , රශ්මිගෙ සම්බන්ධෙ. කොල්ලෙක් උනත් දරාගන්න පුලුවන් සීමාවක් තියෙනවනෙ බං.

ඉතින් මමම ශෝටකුයි , ඔලුවට රෙද්දකුයි දාගෙන බොබ් මාලි වගේ පහලට බැස්ස. බැහැල පාර අයිනට වෙලා හිටගෙන හිටිය.

ටිකකින් සුදු පාට කාර් එකක් හෙඩ්ලයිට් දෙකත් ඩිම් කරන් ඇවිල්ල මං ගාවින් නවත්තල ශටර් එක ඇරිය. කාර් එකේ හිටියෙ සුදු නෝනා කෙනෙකුයි එහා පැත්තෙ සීට් එකේ පොඩි අතදරු කෙල්ලෙකුයි.

"මේ මිස්ටර් ගිම්හාන් ද?"

ඒ කාර් එකේ ආපු ලේඩි මගෙන් ඇහුව.

"ඔ...ඔව් මිස්. මේ අර ෆෝන් එක භාරදෙන්න ආපු මිස් නේද"

"ඔව් ඔව්. කන්ෆර්ම් කරගන්න ඇහුවෙ. පොඩ්ඩක් ඉන්න"

ඒ මිස් එහෙම කියල කාර් එකේ පිටිපස්සෙ සීට් එකට නැවිල පාර්සලයක් අරන් මට දුන්න. බ්‍රවුන් පේපර් එකකින් ඔතපු එකක්.

"ආ මෙන්න. යාලුවට කියන්න මීට පස්සෙ සිහියෙන් යන්න කියල"

"හරි මිස්. ගොඩක් පින් මිස්. මේ උදව්වට"

මම එයාට මිස් මිස් කිව්වෙ කාර් එකකින් ආපු නිසා. නැතුව මහලොකු වයසක් නෑ වගේ. අම්ම කෙනෙක් වෙන්න තරන් නං කොහොමත් වයසක් නෑ වගේ නිකං.

"හරි හරි ඒකට කමක් නෑ. ගිම්හාන් මොනාද කරන්නෙ?"

"මම පීසී ඔපරේටර් කෙනෙක් මිස්"

"වෝහ්... එහෙනං පස්සෙ මටත් උදව්වක් කරල දෙන්න පුලුවන් වෙයි නේද?"

ඒ මිස් හිනා වෙලා එහෙම ඇහුව.

"අනේ කියන්නෙ මිස්. ඕනෙ වෙලාවක කරල දෙන්නං"

" නෝ... නෝ... ඉට්ස් ඕකේ... මම ගිහින් එන්නම් ගිම්හාන්. ටේක් කෙයාර්"

"හරි මිස්. තෙරුවන් සරණයි. ඔනෙ වෙලාවක කෝල් එකක් දෙන්න ඒ සම්බන්ධ වැඩක් නං. මම ලොවෙත් කරල දෙන්නං"

"සිලී බෝයී.... මං ගිහින් එන්නං."

මිස් ආපහු කාර් එක ස්ටාට් කරන් යන්න ගියා. මාර හොඳ මිස් කෙනෙක්. හෙන ලස්සනයි. නිකං දැක්කම ආස හිතෙන ලස්සනක්. දෙපාරක් බලන්න හිතෙන ලස්සනක් නෙවේ. එක පාරින්ම හිත පිරෙන ජාතියෙ ලස්සනක්.

මමත් බෝඩිමේ තට්ටු පහ තරණය කරන් අපේ කාමරේට ආව. මේක නිකං හිකින් වගේ. ආ නෑ සොරි. හයිකින්! දවසට දෙපාරක් තුන්පාරක් මේක නැගල බැස්සම නල්ල සුහම්.

ආපහු පාරක් ඇඳට වැටිල නිදාගෙන එලාම් එකටම ඇහැරුනා.

ඇම්ඩයි මෝලයිත් ඒ සද්දෙට ඇහැරුනා. ඇම්ඩා , උගෙ ෆෝන් එක අපේ මේසෙ උඩ තියෙනව දැකල උඩ පැනගෙන බල්ටි ගහගෙන ආවෙ ඒක ගාවට.

"තෝ මීට පස්සෙ ගෑණු පරාණ එක්ක එහෙ මෙහෙ යනකොට තමුසෙගෙ බඩු ගැනත් සර්ච් එකේ හිටපං. ගෑණියෙක්ව ළඟට ගත්තම අපේ හැත්තට ඔක්කොම අමතකයිනෙ"

මෝලා පඬි ටෝක් දෙනව උදේම.

මම මුකුත් කියන්නෙ ගියෙ නෑ. බිකෝස් මාත් ඔහොමනෙ ශලනි ගාව. මෝලටත් සිරා කෙල්ලෙක් සෙට් උන කාලෙක බලමුකො. ඌත් චීත්ත හෝදන්න යන විදිහ.

මම ලෑස්ති වෙලා පහලට බැස්ස. මෝලා අද නිවාඩු. ඇම්ඩ පරක්කු වෙලානෙ යන්නෙ. මම ශලනි එක්ක බස් එකේ යන්න බස් හෝල්ට් එකට ආව. ශලනි එතකොටත් ඇවිල්ල හිටියෙ.

"ගුඩ්මෝනින් කුමාරය. ඊයෙ ඔයාලගෙ කාමරෙන්ද මහ හයියෙන් කෑගැහුවෙ?"

ශලනි මම බස් හෝල්ට් එකට ගොඩ උන ගමන්ම වගේ ඇහුව. ඇම්ඩගෙ අඳෝනාව පහලටත් ගිහිල්ල ඒ කියන්නෙ.

"ආ අර ඇම්ඩගෙ භූත දෝසෙ. ඌ හීනෙන් බය උනා රෑ මැද්දෙ"

"අයියෝ තාම හීනෙන් බය වෙනවද අනේ. ඒක නෙවෙයි"

"ම්ම්ම්ම්ම්ම්"

"ඊයෙ මම ඉක්මනට කාමරේට ගියා කාල. චතුමි අක්ක කිව්ව ඔයා බටුමෝජු ටිකක් ගෙනාව කියල. සොරි ගිම්හාන්. දන්නව නං මම ඉන්නව"

"නෑ නෑ ඒකට ප්‍රශ්නයක් නෑ. දැන් අවුලක් නෑනෙ"

"ම්ම්ම්ම්ම් දැන් හොඳයි"

"එහෙනං එච්චරයි."

"මේ. උදේ පාන්දර මොකෝ හදිස්සියෙම පහලට බැස්සෙ. කවුද අර කාර් එකෙන් ඇවිල්ල හිටියෙ"

ඔය ඇනිල තියෙන්නෙ පිදුරුතලාගල කන්දෙ එහා පැත්තෙන් මතු වෙන්නම. ශලනි කොහොමද යකෝ ඒක දැනගත්තෙ.

"ඔයා කොහොමද ඒක දන්නෙ"

"උදේ මම එලියට ආව පොඩ්ඩක්. බැල්කනියෙන් දැක්කෙ. මොකක් හරි ප්‍රශ්නයක් උනාද?"

"නෑ නෑ අර ඇම්ඩගෙ ෆෝන් එක වැටිල ඊයෙ. මිස් කෙනෙක් ඒක අහුලගෙන. එයා කිව්ව උදෙන්ම ගෙනත් දෙන්නං කියල. ඒ මිස් තමා කාර් එකෙන් ආවෙ"

"ආහ්. රශ්මි කිව්ව තමා ෆෝන් එකක් වැටිල කතාවක්. දන්නවද ඒ දෙන්න ඊයෙ කොහෙද ගිහින් තියෙන්නෙ කියල?"

"නෑනෙ. කොහෙද ගිහින් තියෙන්නෙ"

ඇම්ඩා ජීවිතේට උගෙ ගෑණු සම්බන්ධ සිදුවීම් අපිට කියන්නෑ කියල මම කිව්වනෙ කලින් උඹලට.

"දෙන්නත් එක්කම ගිහිල්ල ක්ලබ් එකකට. රශ්මි නං බීලත් වගේ ආවෙ. ඔයාලගෙ යාලුව බීල හිටියෙ නැද්ද?"

ශලනි කිව්වම මතක් උනේ. ඇම්ඩා නිකං අසිහියෙන් වගේ මාව ඉඹින්න ආවනෙ. කොල්ලො කොල්ලො ඉඹගන්න තැන් දෙකක් තියෙනව බං. එකක් , ලාවට දැනෙන්න ගහල ශේපට වදිනකොට. අනික් එක අර ඇම්ඩගෙ භූත මාම වගේ උන්. හැබැයි එකම අවුල ඇල්කොහොල් ගඳක් නං ආවෙ නෑ.

"එහෙම ලයින් එකක් දැක්ක මං. කොහොමහරි ඉතින් මුන් ෆෝන් එකත් හලාගෙන"

"අනේ මංද. මේ ඔයා එහෙම යන්නෑ ඔය ක්ලබ් ගානෙ හරිද. ඕවගෙ මොන මොන මිනිස්සු ඉන්නවද දන්නෑ"

"හරි හරි"

මටත් පුදුමයි හැබැයි ඇම්ඩා ක්ලබ් එකකට ගියා කිව්වම. උට අඩු ගානෙ සංගීත රසයක් , නර්තන රසයක් තියා අඹ මාලුවක රසක් වත් දැනෙන එකෙක් නෙවේ. එක්කො රශ්මි මූව එක්කන් ගිහිල්ල. නැත්තං මූ කලින්ම කොහෙන් හරි බීල , අවසිහියෙන් ක්ලබ් ගිහිල්ල. රශ්මි පොඩ්ඩක් ගානට වැඩී වගේ.

කෝකටත් ඩබල ගැන මීටරෙන් ඉන්න ඕනෙ.

මුලින්ම ආපු බස් එකේ නැගල , මම ශලනිට හේත්තුවක් දාගෙනම ඇවිල්ල , අපි දෙන්නම සුහුරුපාය ගාවින් බැස්ස. ශලනිගෙ තනියට මම එයත් එක්කම සුහුරුපාය එන්ට්‍රන්ස් එකට ගාවටම ඇවිදන් ගිහිල්ල තමා ආපහු අපේ ඔෆිස් එකට ආවෙ.

ජීවිතේ..... සොඳුරුයි කියා.....

ඒ දවස් කීපයම වගේ ශලනි එක්ක සැපේ ගෙවිල ගියා. එන්න එන්නම අපි දෙන්න තවත් ළං උනා. ඕනෙම ලව් එකක මුල් කාලෙ හෙන සුන්දරයිනෙ. පස්සෙනෙ නිකං ගාසා තීරෙට මරාගන්න පලස්තීනෙයි , ඊස්‍රායලෙයි වගේ වෙන්නෙ.

අපේ කාමරේට අලුතෙන් ආපු අර බුවා. නාලකය. ඌ ලෝක දෙක තුනක් කාල බ්‍රහස්පතිගෙ චන්ද්‍රයෙකුත් කාල වතුරත් බීල ආපු ඩයල් එකක්. මෝලාගෙම අනිත් පලුව වගේ.

කුණුහරප ගැන මාස්ටර් උපාධියක් තියෙන එකෙක් ඌ. මහා පරිමාණ කුණුහරප වපුරන්නෙ. ආපු පළවෙනි දවසෙ බෙලෙක්කෙන් වගේ හිටියට ඊට පහුවෙනිදම ඌ බොක්කෙන්ම සෙට් උනා අපිට. හෙන හිත හොඳ පොරක්. හැබැයි එකම අවුල උගෙ බීමත්කම. සිකියුරිටි ජොබ කරන නිසා මෑන් හැමදාම රෑට ශොට් එකක් දානව. ඌ කියන විදිහට හොරෙක් ආවත් බය නැතුව ෆේස් කරන්න නං කාලක්වත් ඇඟේ රන් කරල තියෙන්න ඕනෙලු.

නාලකයයි මෝලයි උන්ගෙ ඇඳවල් ශෙයාර් කරගත්ත. නාලකය ගාව තියෙනව අර ඔතන මෙට්ටයක් වගේ ගැජට් එකක්. මෑන් ඒක කාමරේ මැද්දෙන් දාගන්නව රෑ ඉන්න දවසට. උට සෙනසුරාදයි ඉරිදයි නිවාඩු. ඉතින් ඒ දවස් දෙකට අපේ කාමරේ පොඩියට ස්ටොරේජ් ෆුල් ගතියක් එනව.

රශ්මි එක්ක ඇම්ඩා ක්ලබ් ගිය සීන් එක නිසා මම වගේම මෝලාත් ඌ ගැන අවධානෙන් හිටියෙ. නාලකය මේ හරියෙ හැම ගුබ්බෑයම දන්න නිසා අපි උගෙනුත් අහල බැලුව. ඌ කිව්වෙත් අපි හිතපු විදිහෙ කතාවක්ම තමා. ක්ලබ් යන ගොඩක් උන් ටික කාලෙකින්ම මොනාම හරි මත්ද්‍රව්‍යයකට හුරු වෙනවලු. ඇම්ඩව පරිස්සන් කරගන්න ඕනෙ නිසා මෝලයි මමයි බැස්ස ගේමට. නාලකය නං බෝඩිමේ නෑනෙ අපි ඉන්න වෙලාවට.

ඔහොම ඔහොම ගිහිල්ල , අපි ගිය සෙනසුරාද , ඇම්ඩගෙන් ඉල්ලපු බොන පාටිය දාන දවසටත් ලං උනා. ඒ කියන්නෙ සිකුරාදට. සිකුරාද හවස තමා ශොට් එකක් ගහන්න සුපිරිම දවස. සතියක් වැඩ කරල , ඊට පස්සෙ එන නිවාඩු දවස් දෙකේ සුවය හිතට එන දවසනෙ.

රශ්මි එක්ක මුගෙ සම්බන්ධෙ ගැන විනය පරීක්ශණයක් කරන එක වෙනම දෙයක්. ඒ උනාට ඌ ගානෙ නිකං බොන්න හම්බෙනව නං විනය පරීක්ශණයක් උනත් තාවකාලික වාරණ නියෝගයක් දාල අත්හිටුවන්න බැරියෑ.

"ඕයි කීයක් ගේනවද. මොනවයින්ද ගේන්නෙ?"

සිකුරාද උදේම ඇම්ඩා දත් මදින ගමන් මගෙන් ඇහුව. මෝලත් හිටිය.

"මොනා හරි ගෙනෙන්. පාටි නොදී ඉඳියොත් නං ලව් එකට කෙලවෙනව පුතෝ ඈ. ඕව මාරක පාපකර්ම"

"හරි හරි ලබ්බෝ. මොනවයින්ද ගන්නෙ. මට නේවි සීල් එක නං බෑ හොඳේ. ඒ ජරාව කොහොමද යකෝ බොන්නෙ."

"බ්ලැක් ඕපල් දෙකක් ගෙනෙන්. නාලකයත් ඊයෙ සල්ලි ටිකක් දීල ගියා. ඌත් ස්පොන්සර් කරනව කිව්ව. ඌ ආපු එකටයි උඹේ ලව් එකටයි දෙකටම එක පාටියෙන් ශේප් වෙමු"

"හා හා. බයිට් එකට මොනාද ගේන්නෙ"

"කොත්තු නං එපා ඈ. එදා කාපු එකෙත් පොල් මුඩු කෑල්ලක් අහු උනා. වැදිල හිටපු නිසා ඒකත් ගහල ඇරිය."

"එහෙනං මොනාද ගේන්නෙ"

"ඔය තියෙන්නෙ බං තව බයිට්. තෙල් දාපු කඩල ටිකක් , වඩේ , ඉස්සො. ඒවගෙ ඒව ගෙනෙන්. ලොකුවට සමරමු"

"හා හා"

ඇම්ඩව මෝරා කරගන්න හෙන ලේසි. පොඩියට කදේ දැම්මම ඌ නිකංම සරෙන්ඩර්. හැබැයි උගෙ කටින් උගෙ ලව් එකක් ගැන අහනව කියන්නෙ ඉබ්බගෙන් සෙලියුලෝස් තන්තු ඉල්ලනව වගේ වැඩක්.

ඇම්ඩට ඕඩරේ භාර දීල මම කලින්ම පහලට බැස්ස සුපුරුදු විදිහටම. ශලනිත් ගානටම වෙලාවට බස් හෝල්ට් එකට ඇවිල්ල හිටිය.

"ගුඩ් මෝනින්..."

"මෝනින්...."
කියාගෙන මම ගිහිල්ල ශලනිට ගෑවෙන්නම ළඟින් හිටගත්ත.

එයත් එයාගෙ අතක් අරන් අස්සෙන් දාල මගෙ අතත් එක්ක පටලවගත්ත.

"මේ ගිම්හාන්. ඔයාල හෙටත් බෝඩිමේද?"

"ම්ම්ම්ම් ඔව්නෙ. අපි ගෙදර යන්නෙ මාසෙ අන්තිම සතියෙ"

"මම ගෙදර ගිහින් එන්න බැලුවෙ ගිම්හාන්. ගිය සතියෙත් ගියෙ නෑනෙ. අනේ කමක් නෑ නේද. මට ඔයත් එක්ක එන්න හම්බෙන්නෑ. ආපහු එන්නෙ සඳුදට මං"

"අයියෝ හරි හරි ඒකට කමක් නෑ. හවසනේ යන්නෙ."

"ඔව්ව්ව්. අප්පච්චි එනව කිව්ව එක්කන් යන්න."

"හරි මම හවසට එන්නං කතා කරන්න. හානෙ"

"හා......"

ශලනි නැති weekend එකක් කියන්නෙ නිකං පොලිසිය පනින්නැති කසිප්පු වාඩියක් වගේ. කිසිම ගැම්මක් නෑ. ඒ සාස්තරේ ඵල දෙන්නෙත් නෑ එහෙම පොට් එකකට.

ශලනි හවස ගෙදර යන නිසා එයා කලින්ම ඕෆ් එක දාල බෝඩිමට ආව. මමත් ඉතින් ඔෆිස් එකේ ඉඳිය කියල කරන්නෙ පුටු රත් කරන එකනෙ. මමත් ශෝට් ලීව් එකක් දාල ගෙදර ආව. මෝලයි ඇම්ඩයි නාලකයයි නං හවසනෙ එන්නෙ.

බෝඩිමට අපි දෙන්න ආපු ගමන් මම කාමරේට ඇවිල්ල ශෝටක් ගහගෙන ආපහු පල්ලම් බැස්ස ශලනිගෙ කාමරේට. බිකෝස් දවස් දෙකකට දකින්න වෙන්නෑ කියන්නෙ අද මොනා හරි ඉල්ලගන්න එපැයි ඒ දවස් දෙකටත් හිලව් වෙන්න.

ශලනි ඇඳුම් පැක් කරන අතරෙ මම රශ්මි ගැන සේපට ටෝක දැම්ම.

"රශ්මි නිතරම එහෙ මෙහෙ යනවද?"

"ම්ම්ම්ම් රශ්මි අමුතුයි ගිම්හාන්. මම ආපු දවසෙම චතුමි අක්ක කිව්ව රශ්මි එක්ක වැඩිය ආස්‍රෙට යන්න එපා කියලත්. මම හිතුව ඒ දෙන්නගෙ මොකක් හරි ප්‍රශ්නයක් කියල. ඒ උනාට රශ්මි ඇත්තටම අමුතුයි"

"අපේ අර කාමරේට ආපු නාලකය අමුතු කතාවක් කිව්වනෙ"

"ඒ මොකක්ද?"

"මේ පැත්තෙ ක්ලබ් වල හරියට ඔය හෙරොයින් , ටැබ්ලට් එහෙම හුවමාරු වෙනවලු. ගොඩක් අය ඒවට පුරුදු වෙනවලු"

ශලනි මං දිහා බලන් ඉඳිය මූණෙ කිසිම හැඟීමක් නැතුව. පස්සෙ එයා මට හිමීට කතා කලා.

"මම පෙන්නන දේ කාටවත් කියන්න එපා හරිද?"

"ඒ මොකක්ද?"

ශලනි එයාගෙ ඇඳුම් බෑග් එක ඇඳ උඩම තියල කණ්නාඩි මේසයක් ගාවට ගියා. ඒකෙ පහළම තට්ටුවෙ තිබ්බ ලාච්චුවක් ඇරල එයා මොකක්ද මංද අමුතු කුප්පියක් ගත්ත එලියට.

"මේව අඳුරනවද ඔයා මොනාද කියල. මම නං හිතන්නෑ බේත් කියල"

ශලනි ඒක ඇරල පෙන්නන ගමන් කිව්ව මට. මට එක පාරින්ම ඒ මොනාද කියල අඳුරගන්න පුලුවන් උනා. කුප්පියෙ තිබ්බෙ බේත් පෙති වගේ ජාතියක්. ඒ ඇපල් පෙති කියන මත්ද්‍රව්‍ය ජාතිය. මහ ලොකු ඇබ්බැහිකාරකයක් නෙවේ. ඒ උනාට ගාණ අඩු නිසා ගොඩක් වේගෙන් ව්‍යාප්ත වෙන එකක්.

"මේව කොහෙන්ද ඔයාලට?"

"ඔය රශ්මිගෙ"

"මොකක්?"

"හම්ම්. මට මුකුත් කියන්න විදිහක් නෑ ගිම්හාන්. චතුමි අක්ක දන්නෙත් නෑ. රශ්මි කියන්නෙ ඇත්තටම හොඳ කෙනෙක්. ඒ උනාට එයා අනවශ්‍ය දේවල්නෙ කරන්නෙ. මේව මොනාද කියල දන්නව නේද ඔයා?"

"ඔය ඇපල් පෙති. ඩ්‍රග්ස් වර්ගයක්"

"මට හිතුන. ඔයාගෙ යාලුව ලව්ව රශ්මිව මේකෙන් ඈත් කරන්න බලන්න පුලුවන් නං. චතුමි අක්කට කිව්වොත් එයා රශ්මිව පන්නල දාවි."

"හම්ම්. මම ඇම්ඩට කියන්නං. ඔයා යන එක හොඳයි එහෙනං. මම හෙටයි අනිද්දයි දෙකේම වැඩේ කරල දාන්නං"

"හම්ම්. බඩු ලෑස්ති කරන් ඉවරයි ගිම්හාන්. අප්පච්චි තව ටිකකින් එයි."

"හරී එහෙනං. ආපහු දවස් දෙකකින්නෙ හම්බෙන්නෙ. මම ඔන්ලයින් එන්නං. හානෙ"

"ම්ම්ම්ම්ම් හා..."

මේ වෙලාවෙ කරන්නෙ ඕනෙ සාමාන්‍යයෙන් බදාගන්නව වගේ වැඩක් නිසා මම ශලනි ගාවට ගිහින් අත් දෙක දිග ඇරිය.

ඒ උනාට එයා , මම අත් දෙක දිග ඇරපු ගමන් මගෙ පපුවට අත් දෙක තියල තුරුල් වෙලා ඉස්සිලා , මගෙ තොල් දෙක කිස් කලා.

ස.... රී..... ගා..... ම....... ස..ස.. රි.. රි.. සා......

මගෙ මූණට රස්නෙට වැදුන ශලනිගෙ හුස්ම , මාව තව තවත් ඇවිස්සුව.

ඒ තොල් දෙක.....

පුදුම රසක්.... ශලනිගෙ දිව අපේ තොල් මැද්දෙන් ඒ මේ අතට යන අතරෙ මම ඒ තොල් දෙකයි දිවයි දෙකම රස බල බල එයාගෙ කම්මුලෙන් අල්ලන් මට තද කරගත්ත.

විනාඩියක විතර සිපගැනීමකට පස්සෙ ශලනි මගෙන් එහාට උනේ මූණ රතූ කරගෙන.

"දවස් දෙකකටම ඇති දැන් නේ"

නිහඬතාව බිදින්න කියල හිතාගෙන දුන්නා ගොන් ටෝකක් මං.

"මෝඩයා...... මේ මම පහලට යනවා. පරිස්සමට ඉන්න එහෙනං... කාමරෙන් ඉන්න එපා. අරගොල්ලො එයි"

"හරි මැඩම්. ඔයත් පරිස්සමට යන්න..."

"ගිම්හාන්. අරකත් පොඩ්ඩක් බලන්න හොඳද?"

"හරි හරි"

මම හිතුවෙ ශලනි ලොකු පෝස්ට් එකක කෙනෙක් නිසා හෙන දඩාර සයිස් වාහනේකින් අප්පච්චි එයි කියල. ඒ උනාට වයසක අන්කල් කෙනෙක් වගේ කෙනෙක් ආවෙ. පොඩි බයිසිකලයක්. සීට් කවර ඉඳන් ඉරිල. ශලනි එයාගෙ බෑග් එකත් අරගෙන මටත් අත වනාගෙන ගියා. ඒ අන්කලුත් හෝන් පාරක් ගහල ගියා. ජොලි පොරක් වගේ.

ශලනිත් ගිය නිසා මම කාමරේට වැදිල හිටිය. ඇම්ඩගෙ කේස් එකත් බලන්න එපැයි. මුන්ට වෙන ආතල් ගන්න විදිහක් ඇත්තෙම නැද්ද මංද , මේ මගුල් කරන්නෙ.

හවස් වෙලා ඇම්ඩටත් කලින් නාලකයයි මෝලයි ආව. ඊට විනාඩි තිහකට විතර පස්සෙ ඇම්ඩා ආව බඩු ලොට් එකක් උස්සන්.

බෝතලුයි , සෝඩයි , අනං මනං හැම රෙද්දම.

"ඔන්න එහෙනං පාටිය ඈ. ඇඟ පත හෝදන් එමු. අද ලස්සනට ගහන්න ඕනෙ"

මෝලා බෝතල් දෙක දිහා බලන් කිව්ව. නාලකය නං ප්‍රතිපත්ති පූජාවක්. බ්ලැක් ඕපල් කියන්නෙ උට නිකං මී පැණි වගේ.

අපි සෙට් එකම ඇඟ පත හෝදන් ඇවිල්ල කාමරේ මේසෙ වටේ වාඩි උන ගමන් ඩලස්! ගාල ලයිට් ගියා.

"අඩෝ අඩෝ. කෙලියනෙ ඉතින් තාප්පෙටම"

නාලකය කලුවරේම කෑ ගහනව.

"ඇම්ඩා , සංක අයියගෙන් අර ලෑම්ප් එක ඉල්ලන් වරෙන්. පුලුවන් නං බට කෑල්ලත් ගෙනෙන්"

මම ඇම්ඩට කිව්ව.

නාලකය තාම දන්නෑ සීන් එක. ඌ කන්පියුස් වෙලා වගේ කතා කලා.

"මොකක්ද උඹල කරන්න හදන්නෙ?"

"ඒ මෝලා මුට කියහං සීන් එක"

මෝලා හැදී පැහැදී විස්තර කලා.

"මෙහෙමයි. බෝඩිමේ නීති අංක තුන A වගන්තිය යටතේ , අපි බොන පාටියක් දාන වෙලාවකට ලයිට් ගියොත් , අපි බොන ගමන් ලස්සන ලස්සන කතා කියාගන්නව. හොල්මන් කතා. ලව් කතා පැණි කතා වල් කතා. ඕනෙ කතාවක්. අර බටයක් ගේනව කිව්වෙ. ඒක අපි හතර දෙනාට මාරුවෙන් මාරුවට යනව. උඹ බටේ ගත්තම උඹ ලස්සන කතාවක් කියන්න ඕනෙ. උඹ කතාව කියන කොට අපි හතර දෙනාම හිමීට ශොට් එක ගහනව. කතාව ඉවර උනාම උඹට ෆුල් ශොට් එකක් වෙනම හම්බෙනව. උඹ ඒකත් ගහල බටේ දෙනව එහා පැත්තෙ එකාට. ඔහොම ඔහොම බෝතල් දෙක ඉවර වෙනකංම යනව. උඹට පුලුවන් කතාවක් නොකිය බටේ පාස් කරන්න. හැබැයි උඹට අර වැඩිපුර ශොට් එක මිස් වෙනව. තේරුනාද?"

මෝලා දුන්නා එක්ස්ප්ලනේශන් එකක් නිකං දොඹෙන් යන්න. අපි ඇම්ඩට ඇම්ඩ කියන්න ගත්තෙත් ඕක නිසා. ඌ ඉස්සර මෙහෙම අවස්ථාවක ඇම්ඩගෙ කතාමයි කියන්නෙ. සමහර ඒව අපි අහලත් නෑ.

නාලකයත් වැඩේට සෙට් උනා. ඇම්ඩත් ලෑම්ප් එකයි බටෙයි දෙකම උස්සන් ආව.

දැන් එහෙනං කතා වටයක් තමා යන්නෙ ඊළඟට!

මතු සම්බන්ධයි...