EraNga Hapugolla

Content Writer

Jul 01 2024 @ 14:09



•  Share

ටොලමියන් රැජිණ 🔱 (the story based for Tolamian Queen AI music)

කාලයේ අග්නියෙන් ගිනිගත්ත මරු කතර
හිරුදෙවිට කැප රජුන්'කම්කෙරූ බිම මිසර
ගික පැවතකින් පැමිණ සිහසුන් ලබා පවර
ටොලමියන් රූ රැජිණ අයිසිස් වෙසින් අසර

එකල ලොව රුවෙන් අග රැජිණ'යැයි නම්දැරුව
නෙත් අඳුන්, විළවුමෙන් පියවි ලොව නිදි කෙරුව
ගික රජුන්, බල ඇතුන් හිස හොවා දණ නැමුව
දැන් රැජිණ වහලියකි රන්කුටියෙ සිරකෙරුව

විෂඝෝර ඵණිදෙක්මි උණු මසට පෙම් බඳින
රැජිණටද මා අවැස ගත පුරා විඳගන්න
මුර කපොලු පසු කලෙමි සැඟව තුල ඵළ බඳුන
රූමතිය සැරසෙන්නෙ "සැනසුමක්" ලැබගන්න

දැත් යුග රන්සයන ඉහ අගට පමුණුවා
විපුල රණ තිසර අග විෂ තුඩින් කෙලෙසුවා
සිහින් ගෙල නා දෙතොල් ලවන් තෙත පතුරවා
ගත පුරා සිත දවන ජිව්හ යුෂ තැවරුවා

රූමතිය සිහින ලොව කෙඳිරියෙන් මුසපත්ව
සුර ලොවට ඔරු පදියි නා විසෙන් මන්මත්ව
දෘඩ සරින් රළ බිඳෙන පසුළුයම හෝරාව
රන් සයන නිහඬවිය වතක් ඇත ගත පරව

- EraNga (එරා)
14.11.2021

______________________________
අතීතයේ ලොව රූමත්ම කාන්තාව ලෙස විරුදාවලිය ලැබූ පුරාණ ඊජිප්තුවේ පාලක ග්‍රීක ජාතික ක්ලියෝපැට්‍රා රැජිණගේ ජීවිතයේ අවසාන මොහොත ලෙස මෙම පැදි පෙළ හැඳින්වීමට මා කටයුතු කලද සැබවින්ම මෙය ක්ලියෝපැට්‍රා රැජිණ මෙන්ම යම්කිසි ක්ශේත්‍රයක බලයෙන් අග්‍ර වූ කාන්තාවක් තම තත්වය පිළිබඳව කිසිවක් දුරදිගනොසිතා "කවිකාර හිතක්" සමඟ තම තනි කැමැත්ත මත සීමා රහිතව ඉතා සමීප හෝරාවක් ගෙවා දැමූ අවස්ථාව ගැන තැබූ මතක සටහනකි...😉

ඉතිහාස කතාව -
ඔබ ඇතුළු බොහෝ දෙනෙක් ක්ලියෝපැට්‍රා ඊජිප්තු ජාතික රැජිනක් ලෙස හදුනාගත්තද ඇත්තවශයෙන්ම ඇය මහා ඇලෙක්සැන්ඩර් රජුගේ ටොලමි නම් සේනාධිපතිවරයෙකුගේ පරම්පරාවේ කෙනෙකි..
ඊජිප්තුව යටත් කරගෙන සිටි ඇලෙක්සැන්ඩර් රජුගේ ඇවෑමෙන් පසු ඔහුගේ සේනාධිපතිවරුන් 12 දෙනා එතුමා පාලනය කල අධිරාජ්‍ය කොටස් 12කට බෙදාගෙන පාලනය කල අතර ටොලමි නම් සේනාධිපතිවරයා තමන් I වන ටොලමි ලෙස හදුන්වාගනිමින් ඊජිප්තුව පාලනය කරන ලදී.. එම පරම්පරාවේ අවසාන රාජ්‍ය පාලකයා වූ ක්ලියෝපැට්‍රා රැජිණ තම පිය පාර්ශවයේ පාලකයන්ට වඩා ඉතා තාත්වික ලෙස ඊජිප්තු වැසියන්ට සමීප වෙමින් ඔවුන්ගේ භාෂාව, සංස්කෘතිය සමඟ බැඳෙමින් තමන් සම්පූර්ණයෙන්ම ඊජිප්තු වැසියෙක් ලෙසටම පාලන කටයුතු කරගෙන ගිය අතර ඇය රූපයෙන් පමණක් නොව දේශපාලන වශයෙන් ඉතා කපටි, දක්ශ, උගත්, බහුශ්‍රුත කාන්තාවක් ව⁣ශයෙන් ඓතිහාසික මුලාශ්‍රවල දැක්වේ..ඇය තමන්ව සෞඛ්‍ය , විද්‍යාව, පවුල, බුද්ධිය වැනි දේවල්වලට අධිපති මිසර දේවතාවියක් වූ අයිසිස් දේවියගේ නැවත උපතක් බව මහජනයාගේ සිත් තුළ මතයක් ඇතිකර තිබුණ අතර ඇයට විවිධ භාෂා 9+ චතුර ලෙස කතා කල හැකි බවටද සාක්ෂි ඇත.
තම පාලන කාලය තුල රෝම පාලක සීසර් සහ ඔහුගේ අනුප්‍රාප්තික ඇන්ටනී සමග ඉතා දැඩි ප්‍රේම කතාන්දර මැවූ චරිතයක් වූ ක්ලියෝපැට්‍රා පසුකාලීනව සීසර්ගේ පුත්‍රයෙක් වූ ඔක්ටේවියස් රජු ගේ ඊජිප්තු ආක්‍රමණයයේදී සිරකාරියක් වශයෙන් තමන්ගේම මාලිගාවේ සිරබත් කන අතරතුරදී ඔක්ටේවියස් විසින් නොබෝ දිනකින් තමාව වහලියක් ලෙස භාවිතා කිරීමට යන බව කන වැකුණ රැජිණ, තමන්ට හිතවත් මෙහෙකාරියක් ලවා පලතුරු කූඩයක් තුල සඟවා අධි විෂ සහිත සර්පයෙක් ගෙන්වාගෙන ඌ ලවා තමන්ගෙ පියයුරු වලට දෂ්ඨ කරගෙන සියදිවි නසාගෙන ඇත..

#EraNga #TolamianQueen #PtolamianQueen #OneNightStand #LoveAndLust

AI Music based on this story : https://push.fm/fl/tolamianqueen