0
0
අකල වැසි කලු වළා සැනින් නුබගැබට'වුත්
සුන්දිරන් හිරිපොදය සමඟ බෝ පෙම් බඳිත්
සැඩ සුෂිර පාරවයි සෙමෙන් තුරුවියන් වත්
සහස් වේ රැජිණියන් මාලිගෙන් පිට ඇවිත්
වස්සානුරොදයට රුදු බවක් ගැල්වු
අහස් කුස කලු වියන රිදී ඉරි දැල්වූ
අසනිසර නිශේධිත තැන් වෙතම ඇල්වූ
නත්‍ර භූත සරුකරයි මඩඉඩම් හැල්වූ
සිසිල අඹ බිම කනිති වැසි පියසි පිස පිසා
මද ඇරුන කවුළුවෙන් උදක බිඳු ඉස ඉසා
හිරවරණ නොමැති අය හිසේ අත් ගස ගසා
සරති ඔබ මොබ කොයිද ආවරණ අස අසා
වැහිවලා ලිහිණියනි සුන්දිරන් නසාපන්
ඇහි වලා ඉරෙන තැන් සොය සොයා වසාපන්
කුළු අතර දඟ කෙලින අසනියේ අසාපන්
සළු වැනෙන මස්තිෂ්ක තූ වෙන්න ගසාපන්
මෙතෙක්කල් පහත් තැන්වලින් දිය බැස්ස
තුරඟසන් රැව්පිලිරු නා කපන වැස්ස
ප්‍රස්තූත කල භ්‍රෂ්ට එක මිටට රැස්ස
නොදෙමු වතු බද්ද දත් නියවන්න ඇස්ස
- EraNga (එරා) කවිකාර හිත
20.04.2022
( 💠සංහිඳ "නොලියූ කවි" තරඟාවලියේ ජනප්‍රියම සඳැස් අංශයේ තෙවන ස්ථානය 💠)
#බක්මහේවැහිදාක
#ForThePeople
___________________________________
''විප්ලවය යනු ඉතිහාසයේ නිර්මාණාත්මක උමතුවයි...!"
- Leon Trotsky
තමන් අයත් ශ්‍රෙණියේ හැසිරීම තමන් ඇතුළු බහුතරයක් දෙනාට දරාගතහැකි සීමාවෙන් ඔබ්බට ගිය අවස්ථාවල ඊට එරෙහිව අරගල කිරීම මානව සමාජයේ ආරම්භයේ සිටම දක්නට ලැබෙන පොදු තත්වයක් වන අතර එම අරගල වල ප්‍රතිඵල ඒවායේ සාර්ථකත්වයට සාපේක්ෂව වෙනස් වේ...
ශ්‍රී ලංකාවේ තත්වය දෙස බලන විට පසුගිය අවුරුදු හැත්තෑගණනක් පුරාවටම ජනතා නායකයන්, ජනතා සේවකයන්, ජනතා ගැලවුම්කරුවන්, සොඳුරු ආඥාදායකයන් නමින් මිනිසුන්ට ළංවුන වුන සියළුම දේශපාලන බලවේග රටේ ජනතාවට නොව තමන්ගේ යහපැවැත්ම උදෙසා පමණක් කටයුතු කරනබව
වර්ථමානයේදී සාක්ෂි සහිතව බහුතරයකට පසක් වී හමාරය. ඉතිරිව ඇති සෑම පක්ෂයකම අපෘෂ්ඨවංශික සුළුතර පිරිසක් තවමත් තමන් නියෝජනය කරන පාට පක්ෂ වෙනුවෙන් සහ කෙටි කාලීන වරප්‍රසාද වෙනුවෙන් තවමත් නිර්ලජ්ජිතව සුපුරුදු වහල් සේවය සලසමින් සිටි..තමන්ගේ ස්වාමියාගේ බළය ආරක්ෂා කිරීමට හෝ බලයට පත්කිරීමට අරඅදිමින් සිටියි...
රටේ තත්වය ගැන සරලවම සඳහන් කරනවානම් මේ ලියමන ලියන විට අපේ මාතෘ භූමිය අන්තර්ජාතික උද්දමන දර්ශකයේ තුන්වැනි ස්ථානයට පත්ව ඇත. ඒ ගැන අමතර සඳහනක් අවශ්‍යම නැත....
මුලින්ම සඳහන්කල අපේ ශ්‍රෙණියේ දරාගැනීමේ සීමාව ඉතාමත් ඉහලය...
හොඳම උදාහරණයක් වශයෙන් එවකට දියවන්නාව නියෝජනය කල සියළුම සාමාජිකයන්ගේ දැනුවත්භාවය සහිතව බලය වෙනුවෙන් රටේ අහිංසක ජීවිත 300+ බිලිගෙන තවත් විශාල පිරිසක් ආබාධිත කල මෙතෙක් පෘථිවියේ සිදුවූ ම්ලේච්ඡතම මැතිවරණ ව්‍යාපාර උපක්‍රමය වුන පාස්කු ප්‍රහාරයේදී පවා අපේ දරාගැනීම ඉහල මට්ටමක තිබුණි.. එදා උන් අහිංසක අපට සිනාසෙමින් අපිව රැවටූහ.. නමුත් දැන් අපි ඇත්ත දන්නා බැවින් අපි එක මිටට එක්වී ඇත..
අවසානයේ තම තමන්ගේ පෞද්ගලික දේශපාලන මතයන් සුන්නද්දූවිලි කරමින් පසුමිබියටද දරාගැනීමට නොහැකි තරමට අපේ ඒ සීමාව ඉක්මවා ගිය තැන අපිත් අරගලයක් පටන්ගත්තෙමු...
එය වචනයේ පරිසමාප්තියෙන්ම අරගලයකි...වෙනසකට මෙන් එහි අරගල කරුවන්ගේ ප්‍රචන්ඩත්වය නැත..
හදවතින්ම අරගලයට සහභාගිවන්නන් සාමකාමීය..උපක්‍රමශීලීය.. නිර්මාණශිලිය..කොටින්ම එය රාජ්‍ය පාලනයේ අදක්ශ මහළුන් පිරිසකට එරෙහිව තරුණ පරම්පරාවේ smart අරගලයකි.. ඔබ , මම දුටු සියළුම කඩාකප්පල්කාරී බලවේග වලට සාර්ථකව මූණදෙමින්, අරගලයට අයිතිවාසිකම් කියන්නන් පලවාහරිමින් අදටත් අපේ අරගලය රටපුරා සිදුවෙමින් පවතී....
ආදරණිය මිත්‍රවරුණි,
වැස්සක් වස්තු විශය කරගත් කවි පන්තියක් පහලින් අරගලය ගැන සඳහන් කිරීම පිළිබඳව කුකුසක් ඇතිකර නොගන්න..
ගුණදාස කපුගේ මහතාගේ
"කවදාවත්ම නොඑන ගමනක් ගියාදෝ.....
වැහි ලිහිණියෝ.. "
ගීතයෙන් ලැබූ අභිප්‍රේරණය මත
ඔබ මේ දකින්නේ අරගලය වෙනුවෙන් මගේ දෑඟිලි තුඩුවලින් දෙන නිර්මාණශීලී උත්තේජනයකි..
කිවිඳුණි / කිවිඳියණි...
ඔබලාගේ "චිරාගත අනුරාගීය ළද බොලඳ පද" පසෙකින් තබා අපි වෙනුවෙන්, අපේ අනාගතය වෙනුවෙන් නොනවත්වාම පන්හිඳට පණ පෙවීමට ආරාධනා කරමින්
මම යළිත් ලියෝන් ට්‍රොට්ස්කි ගේ කියමන මතක් කරමි...
"විප්ලවය යනු ඉතිහාසයේ නිර්මාණාත්මක උමතුවයි...!" ✊🇱🇰
පද බෙදුම
සුන්දිරන් - බත් කූරන්, කූරැට්ටන්
සුෂිර - සුළඟ
සහස් - දහස් ගණනක්
වේ රැජිනියන් - මෙරුන්,නමනැත්තන්
නිශේධිත - දුර්වල
නත්‍ර භූත - නයිට්‍රජන් වායුව
අඹ , උදක - ජලය
හිරවරණ - කුඩය
තුරඟසන් - හේෂරාවය, අශ්වවෙකුගේ කෑගැසීම
ප්‍රස්තූත කල - වර්ථමානය කාලයේදි
භ්‍රෂ්ට - නරක, කුණු, වැරදි, දුෂ්ඨ, අශිෂ්ඨ, දූෂිත, සම්මතයට නොගැලපෙන දේවල්
