0
0
මම ආදරේ එයාට විතරනේ.....
" උබට පිස්සුද බන්... දැන් ඔය කී වෙනි පාරද...."
මගේ හොඳම යාලුවා සාදි මගේ ඔලුවටත් එකක් ගහලා අහද්දි මං කරේ හිනා වුන එක විතරයි...
ඒක හිනාවක්.... ඔව් වේදනාත්මක හිනාවක්....
" හිනාවෙන්නේ... උබ ආයේ ඌට හා කියපන්කෝ... මම ආයේ කවදාවත් උබත් එක්ක කතා කරන්නෑ..."
මං දන්නවා සාදි මේ දේවල් කියන්නේ මගේ හොඳටම තමා කියලා. ඒත් මම කොහොමද එයාව අමතක කරන්නේ...
මම සහස්‍රා... මගේ අම්මයි තාත්තායි ඩොක්ටර්ස්ලා.. පවුලේ එකම ළමයා වුන මට හැමදේම නොඅඩුව ලැබුනා...
ඒත් එක දවසක් මගේ හිත තවත් කෙනෙක් ළඟ නැවතුනා...
ඒ දවස්වල මං 10 වසරේ..
එයා මගේ පන්තියට අලුතින් ආපු කෙනෙක්...
" Excuse me... මිස් මේ පන්තියට අලුතින් ළමයෙක් ඉන්නවා..."
පියුන් මාමාගේ කටහඬට පන්තියේ හැමෝම ඔලුව උස්සලා බැලුවේ අලුතින් ආවේ කවුද කියලා බලන්න.
එයා හරිම ලස්සන කෙනෙක්.. ම්ම්ම්... පිරිමි අයට එහෙම බෑ නේද... එයා හරිම කඩවසම්... එයා සුදු නෑ.... ඒත් කළුත් නෑ... උසට හරියන මහත... කළුම කළු පාට ඇස්... ඇත්තටම මට හිතෙන්නේ මං ආකර්ෂණය වුනේ ඒ ඇස් දෙකට...
ටීචර් එයාව ඇතුළට ගත්තම එයාම එයා ගැන විස්තර කරා...
එයාගේ නම තෙවීන් සකළසූරිය...
ඔව් ඒ වෙලාවේ එයාගේ නම විතරයි මම අහගත්තේ ඉතුරුවා දැනගන්න පොඩි වුවමනාවක්වත් මට තිබ්බේ නෑ... කොටින්ම කිව්වොත් මම එයා දැක්ක වෙලේ ඉඳන්ම ආදරේ කරන්න ගත්තේ නෑ...
පන්තියේ දක්ෂම ළමයා මම වෙද්දි එයා මගෙන් තමා නෝට්ස් ඉල්ලගත්තේ.. එතනින් අපි දෙන්නා යාලුවෝ උනත් අපි ගොඩාක් ළං වුනේ නෑ..
අපි ළං වෙන්න හේතුව වුනේ අපේ යාලුවෝ.. ඔව් හැමතැනම වගේ අපි දෙන්නාගේ නම එකතු කරලා තිබ්බේ ඒකට හේතුවක් මම නොදැන ඉද්දී....
ඇත්තටම තෙවීන් එහෙම නැත්තන් මගේ තේව් එයා ඉක්මනටම පන්තියේ හැමෝම එක්ක ෆිට් වුනා...
එක දවසක් එයා මගෙන් කැමැත්ත ඇහුවේ මම හිතුවේවත් නැති වෙලාවක. ඒ වෙලාවේ මම ගොළු වුනත් මම කැමති වුනේ නෑ එයා වෙන කෙනෙක්ට ලැබෙනවට... ඉතින් මම එවෙලෙම එයාට කැමැත්ත දුන්නා...
ඔයාලා දැන් බලනවා ඇති මම කවද්ද එයාට ආදරේ කරන්න ගත්තේ කියලා... මමවත් දන්නේ නෑ කවද්ද කියලා හැබැයි මම හිතන්නේ ඒ දේ පටන් ගත්තේ පන්තියේ යාලුවෝ හින්දා... එයාගෙයි මගෙයි නම් එකතු කරලා කියද්දි එයාට ආදරේ හිතුනේ ඉබේටම වෙන්නැති.....
එදයින් පස්සේ අපි දෙන්නා මාස ගාණක් ආදරේ කරා...
හරියටම කිව්වොත් මාස අටක්...
එක දවසක් සාදි මට කිව්වා එයා වෙන කෙල්ලෙක් එක්ක ඉන්නවා දැක්කා කියලා... ඒත් මම විශ්වාස කරේ නෑ...
ඒත් එක දවසක් මමම දැක්කා එයා වෙන කෙල්ලෙක් එක්ක අත් අල්ලන් කුරුණෑගල වැව රවුමේ ඉන්නවා...
අම්මයි තාත්තයි එක්ක ගමනක් ගිහින් එන ගමන් හිටපු මට ඒ දැක්ක දේ හිතාගන්න බැරි වුනා..
ඒත් මම මගේ ඇස් දෙකටත් වඩා එයාව විශ්වාස කරා.....
මම එයාගෙන් ඒ ගැන ඇහුවත් එයා කිව්වේ ඒ එයාගේ නෑදෑ නංගි කෙනෙක් කියලා...
තවත් මාස ගාණක් ගෙවුනේ අපේ O/L විභාගෙත් ඉවර වෙද්දී...
ඒත් එක්කම මට මගේ ආච්චි ළඟට යන්න වුනේ අම්මටයි තාත්තටයි හදිසියේ රට යන්න වෙලා තිබ්බ හින්දා.. ඉතින් මම ගමේ ගියා...
අහම්බෙන් දවසක් මම ආච්චිටත් කියලා කියලා ගෙදරින් බඩු වගයක් ගන්න තියනවා කියලා ගෙදර ආවේ එයාවත් සප්‍රයිස් කරන්න කියලා හිතාගෙන...
ඒත් එදා ඇත්තටම මමයි ස්ප්‍රායිස් වුනේ...
එයා A/L වලට ක්ලාස් යන තැන දැනන් හිටපු නිසා මම එතෙන්ට ගියත් මට එයාව දැකගන්න බැරි වෙනකොට මම එදත් නිකමට ගියේ වැව රවුම පැත්තේ එයා කොල්ලෝ සෙට් එකත් එක්ක ගොඩක් වෙලාවට එතන ඉන්න හින්දා...
ඒත් මම දැකපු දේන් මට දැනුනේ මට එකපාර පිහි දාහකින් විතර අනින හැඟීමක්...
එයා වෙන කෙල්ලෙක් එක්ක බෙන්ච් එකක ඉඳගෙන කිස් කරනවා...
ඒ එදා හිටපු කෙල්ලත් නොවෙද්දී මට තේරුනා එයා මෙච්චර කල් මාව රවට්ටලා කියල..
එදා එයාගෙන් වෙන්වෙලා ආපු මම තවත් මාස ගාණක් ඒ ගැන හිත හිත ඇඩුවේ මට එයාව අමතක කරන්නම බැරි වෙද්දී... ඒ මාස ගාණෙම සාදි මගේ ළඟින් ඉඳන් හිත හැදුවේ අඩුම මගේ අම්මටවත් මේ ගැන දැනගන්න ඉඩ නොතියා...
තවත් මාස ගාණක් ගෙවුනේ මමත් මගේ දෙමව්පියන් වගේම ඩොක්ටර් කෙනෙක් වෙන්න ඉගෙන ගනිද්දී..
ඒ අතරේ එයා හැමතිස්සෙම මගේ ඉස්සරහට හම්බුනේ වාරයක් දෙවාරයක් නම් නෙවෙයි.... ඒ මුණ ගැහෙන හැමවතාවකම මගේ දුක නිව්වේ සාදි...
විභාගෙට මාස දෙකක් විතර තියෙද්දී ආයෙමත් එයා මගේ ළඟට ආවේ මගෙන් ආදරේ ඉල්ලගෙන..
සාදි මට එපා කියද්දී මම ආයේ එයා එක්ක යාලු වුනේ එයා ගැන මගේ හිතේ තිබ්බ ආදරේ කවදාවත්ම අඩු නොවුන නිසා...
අන්තිමට විභාගෙත් ලියලා තවත් මාස දෙකක් විතර අපේ සම්බන්ධය අරන් ගියත් එක දවසක් එයා ආයෙමත් දාලා වෙන කෙනෙක් එක්ක ගියා...
මම දන්නෑ ඇයි කියලා....
අන්තිමට මම දෙවෙනිපාරටත් මගේ හිත බිඳගත්තා....
ආයෙත් එයා පුරුදු විදිහටම එක එක කෙල්ලෝ එක්ක මට පේන්නම ඉද්දී ඒ අයත් එක්ක ගහන ෆොටෝස් හැමතැනම ශෙයා වෙද්දී මම තාමත් එයාට ආදරේ කරා...
දෙපාරක්ම රවට්ටලත් තවත් එයාට ආදරේ කරන්න මට පිස්සුද කියලා සාදි අහපු වතාවල් එමටයි...
ඒත් මම තුන්වෙනිපාරටත් එයා ගැන දැන දැනම එයාට රැවටුනා... ඒක දැනගත්ත වෙලේ තමා සාදි මම ආයේ ඒ ගොන්වැඩේ කළොත් මාත් එක්ක කතා කරන්නෑ කිව්වේ....
ඇත්තටම මම ඒ ගොන්වැඩේ ආයෙමත් කළා...
ඒ වගේම සාදිත් මාත් එක්ක තරහා වුනා...
මේ පාර එයා මාව දාලා යන්නෑ කිව්වාම මම ආයෙමත් එයාව විශ්වාස කළා...
ඒත් එයා කළේ මගෙන් අරකට මේකට කිය කිය සල්ලි ඉල්ලගත්ත එක විතරයි...
ඒ පාරත් මාස දෙකක් විතර තිබ්බ සම්බන්ධය එයාම නැවැත්තුවේ හතරවෙනිපාරට...
මම කලින්ටත් වඩා කඩාගෙන වැටුනේ ඒ දේ මගේ අම්මටයි තාත්තටයිත් ආරංචි වෙලා තිබ්බ හින්දා..
අන්තිමට එයාලා මාව රට යවන්න තීරණය කරේ මම ආයෙමත් රැවටෙයි කියලා බය හිතුන නිසා වෙන්නැති..
අවුරුදු පහකට මම ලංකාවට ආවේ විශේෂඥ වෛද්‍යවරියක් විදිහට...
එක දවසක් මම හොස්පිටල් එකේ මගේ පුංචි ලෙඩ්ඩු ටික බල බල ඉද්දී මම දැක්කේ මීට දවස් දෙකකට කලින් වාට්ටුවට ඇතුළත් කරපු පුංචි බබා ළඟ ඉන්න එයාව....
ඔව් අවුරුදු පහකට පස්සේ මම එයාව දකින්නේ... වෙනදා ඇන්ඳ බ්‍රෑන්ඩඩ් ඇඳුම් අද නැති වෙද්දී මූණ පුරාම රැවුල වවාගත්ත එයාව අඳුනගත්තේ මම ඇස් දෙකෙන්මයි... එයත් මාව අඳුනගත්තා... ඒත් ඉක්මනටම මාව මඟ ඇරලා ගියපු එයා අඩුම බබාගේ ටිකට් කපන දවසේවත් ආවේ නෑ...
එයාට මට මූණ දෙන්න බැරුව ඇති... ඔව් හතරපාරක් එකම කෙල්ලව රවට්ටපු කෙනෙක් ආයේ කොහොම ඒ කෙල්ල දිහා බලන්නද......
ඉතින් මම සාදිගෙන් මේ ගැන ඇහුවා.. එයා මාත් එක්ක ආයේ යාලු වුනා...
" ආ... ඌට ඒ කෙල්ලව බඳින්න වුනා... ඌ අතින් ඒකිව ප්‍රෙග්නන්ට් වෙලා.. හැබැයි ආරංචි විදිහට ඒ එහෙම වුන පළවෙනි කෙල්ල නෙවෙයි.. ඒත් මේක දැනගන්නකොට පරක්කු වැඩි හින්දා ඌට කෙල්ලව බඳින්න වෙලා... පව් ඒකි... දැන් දුක් විඳිනවා... ඌට හරිහමන් ජොබ් එකක්වත් නෑ..."
" පව් බන්... කලින් හිටියා වගේ නෙවෙයි පිස්සෙක් වගේ බන්.. උබ දන්නවද එයාගේ ළමයාගේ ඇස් දෙකත් එයාගේ වගේමයි...."
" නවත්තපන් ඕක... ඌ ගැන හිතන එක නවත්තලා අර ආන්ටිලා ගෙනාපු ප්‍රපෝසල් එකට කැමති වෙයන්... අනේ මන්දන්නෑ බන් අරූ උබව ඔච්චර රවට්ටලත් උබ ඌට තාමත් ලව්...ඒක උබේ ඇස් දෙකෙන්ම පේනවා... මට තේරෙන්නේ උබ ගැන නම් බන්... "
" එයා වටේ ගියාට මම ආදරේ එයාට විතරනේ..." මගේ කටින් පිටවුනේ ඒ වචන ටික විතරයි..
නිමි....
