0
0
| 01 | කොටස 🍄☘️✨ "
දවස් ගානක් තිස්සෙ එකදිගට වහින වැස්ස අදත් වෙනසක් නැතුවම චුරු චුරුව දාගෙන නානායක්කාර මහ මන්දිරේ සාමාන්‍ය පාළුව තවත් ටිකක් පාළු කරන අතරෙ අකේන්‍යා හිටියෙ මේ සුවිසල් මන්දිරේ උඩු මහලෙ වැරැන්ඩාවට වෙලා බර කල්පනාවක..ඒක සාමාන්‍ය වැස්සක් නෙවෙයි..පොළොව හෑරෙන්න තරම් තදට වැහැපු වැස්සක් නිසාම හුලඟත් එක්ක හරි හරියට ඔට්ටු වෙන බර පිනි කුඩුවලින් අකේන්‍යාගෙ ඇඳුම , කොණ්ඩෙ තෙත් වේගෙන එන බවක් වත් එයාට දැනුනෙ නෑ..අකේන්‍යා ඒ සීතල පිනි කුඩු මුහු වෙච්ච ඔක්සිජන් ටිකක් දිග හුස්මක් විදිහට පෙනහළු ඇතුළට ගන්න ගමන් එයාගෙ කල්පනාවෙ තවත් ගැඹුරට ගිලෙන ගමන් මොකද්දෝ දුකක් තුනී කරගන්න ලොකු වෙහෙසක් දැරුවා..මේක එයා ආසම විනෝදාංශය..පුංචි කාලෙ ඉඳලම පාළුවට , තනිකමට හුරු වුන අකේන්‍යා වැස්ස වෙලාවට උඩු මහලෙ වැරන්ඩාවට වෙලා ඉඳිද්දි ඒ ගන්න හුස්ම එයා හිතන්නෙ මේ ලෝකෙ තියෙන පිරිසිදුම ඔක්සිජන් ටික කියලා..මේ වැඩේ නිසා අකේන්‍යා දවස් ගනන් අසනීප වෙලා හිටපු අවස්ථාත් තිබුණා..ඒත් ඒකට හේතුව අකේන්‍යාගෙ මේ වැඩේ බව සුජාතා නානායක්කාර වත් , සුමිත් නානායක්කාර වත් දැනගෙන හිටියෙ නෑ
ප්‍රසිද්ධ ව්‍යාපාරික නමින් සුමිත් නානායක්කාරගේත් , බිරිඳ සුජාතා නානායක්කාරගේත් කුලුඳුල් දියණිය නමින් අකේන්‍යා සුභාෂිණී නානායක්කාර..ව්‍යාපාරිකයෙකුගේ දුවකට පියාගෙ ආදරය , සෙහෙහස , අවධානය අඩුවක් නැතිව ලැබෙන්නෙ කලාතුරකින්..වාසනාවකට අකේන්‍යා ; නානායක්කාර පවුලේ එකම දියණිය..සාමාන්‍ය විදිහටම ඇයට මතක ඇති කාලයක සිට සුමිත් නානායක්කාර නම් නමට පමණක් ඇගේ පියා විය..කිසිම අඩුපාඩුවක් නැතුව අකේන්‍යාට මේ විනාඩියේ උවමනා වූ දේ ඊලඟ විනාඩියේ ඇගේ දෑත් මත තැබීමට තරම් සුමිත්ට මුදල් බලය තිබුණත් දුවෙකුට ජීවිතේ වටිනාම දේ උන පියෙකුගෙ ආදරේ , අවධානය අකේන්‍යාට ලැබුනේ නෑ..පුංචි කාලෙදි අකේන්‍යා ආයාසයෙන් තාත්තගෙ තුරුලෙ හුරතල් වෙන්න පොර කෑවත් දැනුම් තේරුම් ඇති වයසට ආවට පස්සෙ අකේන්‍යා තාත්තට කරදර නොකර තනියම හුඟක් දේවල් දරාගන්න පුරුදු උනා..සුමිත් කොයි තරමක් තමන්ගෙ එකම දෝණියව අතපසු කලත් අකේන්‍යාගේ මුලු ජීවිතේම උනේ තාත්තා..ඇය රුවින් පියාගෙ කපාප පලුව..උපතින් ම දුඹුරු පැහැ බෝල දෑස් යුගලක් හිමි ඇය සැබවින් ම අනර්ඝ සුරඟනකට සමාන උනා
අකේන්‍යාට මව්පිය සෙනෙහස අහිමි වූවා සේම සුමිත්ගේත් සුජාතාගේත් විවාහයත් නමට පමණක් වූ විවාහයකි..සාමාන්‍ය සමාජයට භයක් , සැකයක් නැතිව මුහුණ දෙන්නට ගැහැණියට සැමියෙක් , පිරිමියෙකුට බිරිඳක් උවමනා වන නිසා සමාජයේ අවශ්‍යතාවට සිදු වූ විවාහයක් මෙනි..නැති නම් සුමිත්ගේ පියා වූ ඩෙස්මන් නානායක්කාරගේත් , මව වූ අනුලා නානායක්කාරගේත් උවමනාවට ඔවුන්ගේම කැමැත්ත මත සිදු වූ විවාහයක් යැයි කීම සහතික ය
අකේන්‍යාට පිය සෙනෙහස අහිමි වන්නේ ඔහුගේ දැඩි කාර්‍යබහුලත්වය නිසා උනත් අකේන්‍යාට මව් සෙනෙහස අහිමි වන්නට හේතුව වෙනස්ම එකක් උනා..සුමිත්ගේත් සුජාතාගේත් විවාහය දෙපාර්ශ්වයේම වැඩිහිටි උවමනාවෙන් සිදු වූවක් නිසා විවාහ ජීවිතය ඔවුන් කිසිම දිනෙක නිසියාකාරව වින්ඳේ නැත..සුමිත්ගේ ජීවිතයම වූවේ මුදල් ය..ඒ හැර බිරිඳ හෝ දියණියගේ සැප සනීප හොයන්නට තරම් වේලාවක් ඔහුට තිබුණේ නැත..විවාහයෙන් සතියක් යන්නටත් කලියෙන් සුජාතාට විවාහ ජීවිතය අප්‍රසන්න විය..නමුත් කසාදය කටු ගා දමා සමාජයෙන් ගැරහුම් ලබන්නට ඈ අකමැති විය..ඒ හැර මවකගේ වගකීම හරි හැටි තම කරට නොගත්තත් සමාජයට අනුව ඇය මවක් වූයෙන් දික්කසාදයක් ජීවිතයට ඈඳා ගැනීමට ඈ අකමැති උනා ය..පුංචි අකේන්‍යා උපන් දිනයේ පවා අසීමිත සතුටක් අත් වින්ඳේ මව හෝ පියා නොවේ..ඇගේ ආච්චී හා සීයා වූ අනුලා හා ඩෙස්මන් ය..විවාහයෙන් හෙම්බත්ව උන් සුජාතාට විවාහයෙන් නොලැබෙන සතුට ලැබෙන්නට වූයේ ඇගේ වයසක් නොපෙනෙන රූමත්කමට රැවටුනු ඇගේ රහස් ප්‍රේමවන්ත සල්ලාලයින්ගෙනි..බිරිඳගේ අසම්මත අනියම් සබඳතා ගැන සොයා බලන්නට සුමිත්ට වේලාවක් නොතිබුණි..ඇරත් ඔහු ඒවා නොදැනුවත් වූවා ම නොවේ..ඒ පසුපස පන්නා ප්‍රශ්න කරන්නට තරම් උවමනාවක් ඔහුට නොතිබුණි...අකේන්‍යාට මව් සෙනෙහස අහිමි වන්නට එකම හේතුව මෙය විය
මුදල් අතින් ද කිසිම අඩුපාඩුවක් නොවූයෙන් කුඩා කාලයේ දී ආච්චිගේත් සීයාගේත් අනුදැනුම මත මව හා පියා ගැන නිතරම කල්පනා බර වූ අකේන්‍යා අධ්‍යාපනයට ම පමණක් සිත යොමු කරන්නට විය..සාමාන්‍ය පෙළ විභාගයත් , උසස් පෙළ විභාගයත් ඉහළ මට්ටමින් සමත් උන ඈට විශ්ව විද්‍යාල වරම් ලැබුනත් ඒ විවර වූ වාසනාවන්ත මාර්ගය අහුරන්නට ඇගේ මව හේතුවක් විය..නානායක්කාර මන්දිරයෙන් පිටත සිදු වන සුජාතාගෙ අනියම් පෙම්වතුන් හමුවීම් තම දියණියට හසු වී ගැටලු ඇති වේ ය යන බියෙන් ඇය අකේන්‍යාට විශ්ව විද්‍යාල අධ්‍යාපනය තහනම් කරවන ලෙස සුමිත්ගේ සිත කැලඹුවා ය..සුමිත්ගේ අවසාන තීරණය පරිදි අකේන්‍යා ; සුජාතා හමුවේ පරාජයට පත් විය..ඩෙස්මන් හා අනුලාගේ උත්සහය ද එලෙසම ය..සුමිත්ගේ අවසන් තීන්දුව නම් විශ්ව විද්‍යාලයේ සිව් වසරක් ඉගෙනගෙන රජයේ රැකියාවක් කිරීම තම පවුල් පසුබිමට නොගැලපෙන බවයි..සුමිත්ගේ තීන්දුව මුලු නානායක්කාර පවුලේම තීන්දුවයි..ඔහුගේ මව හා පියාත් මේ වන විට පොළොවේ පය ගසා ජීවත් වන්නේ සුමිත්ගේ මුදල් බලයෙන් නිසා ඔවුන්ටත් එසේම ය
අකේන්‍යාගේ සිතේ සතුට ඇති කල එක ම හේතුව උන අධ්‍යාපනයත් එතනින් නවතා දැමුණු නිසා ඇගේ ජීවිතය නානායක්කාර මන්දිරයේ සුවිසල් බිත්ති අතර ම සිර විය..පාළුවට , තනිකමට තව තවත් ප්‍රේම කරන්නට විය..ඇගේ කල්පනා ලෝකය තව තවත් ගැඹුරු විය..අකේන්‍යා ඇගේ ජීවිතය තුළ අකමැති ම කාලය ගත කළේ මේ නිවස තුළ ය..නිවසින් පිටත ගත කළ කාලයට ඈ වඩාත් ප්‍රිය කළා ය..කාලයක් ගත වන විට මේ සුවිසල් නිවස තුළ ඇගේ ප්‍රියතම ස්ථානය වූයේ ඉහළ මහලේ වැරැන්ඩාවයි..ඈ දවසේ වැඩි කාලයක් ගත කළේ හුදකලාව එහි සිට ඇගේ සුපුරුදු කල්පනා ලොව ගැඹුරට ම කිමිදෙමිනි..ඒ හැර ඈ දවසේ ඉතිරිය ගෙවා දැමුවේ ඇගේ ආච්චී හා සීයා සමග උයමින් , පිහමින් , උද්‍යානය අලංකරනය කරමින් ය..අකේන්‍යා හුදකලාවට අසීමිතව ප්‍රිය වුවත් ආච්චී , සීයා ද නිවසේ සේවක පිරිස ද සමග බොහෝ මිත්‍රශීලී විය
ආච්චිගේ සිතේ ඈ කෙරේ කෙතරම් සෙනෙහසක් තිබුණා ද යත් ඇය අකේන්‍යා උපන් දා පටන් ඈ ඇමතුවේ " ප්‍රින්සස් " කියා ය..සීයා ඈ ඇමතුවේ " බෝනික්කි " කියා ය..ඊලඟට අකේන්‍යාට වඩාත් මිත්‍රශීලී වූයේ නිවසේ සේවක පිරිසයි..ඔවුන් අකේන්‍යා ඇමතුවේ " චූටි බේබි " නමින් උනත් අකේන්‍යා බොහෝ විට ඔවුන්ගෙන් ඉල්ලීම් කළේ " මට දුවේ කියලා කතා කරන්නකො " කියා ය..තමාට දුරින් නෑකම් කියන්නා වූ ආච්චී , සීයාත් තමාට කිසිදු නෑකමක් නැති නිවසේ සේවක පිරිසත් ඇයට මෙතරම් සෙනෙහසක් දක්වද්දී ඇගේ ජීවිතයේ ලඟම ඥාති වූ ඈ වැදූ මවත් හැදූ පියාත් ඇය ඔවුන්ගේ දියණිය යන බවක් හැඟවෙන පරිදි නොඅමතා නිකම්ම නිකම් " අකේන්‍යා " නම් වූ ඇගේ ම නම කියා ඇමතීම ඇයට කුඩා කල පටන් ම තිබූ ඉහ මොළ කිලිපොලන පීඩනයක් උනා..ආච්චිගේ ප්‍රින්සස් නමටත් සීයාගේ බෝනික්කි නමටත් ඈ මහ ගොඩක් ප්‍රිය කළ නිසා ඒවා වෙනස් වනවාට ඈ අකමැති විය..නමුත් චූටි බේබි යන්න ඈට අප්‍රසන්න උනා ය..මවගේ හෝ පියාගේ මුවින් පිට නොවන " දුවේ " යන්න මහ මග යන හිඟන්නෙකුගෙන් හෝ ඇසීමට ඈ බලාපොරොත්තු උනා ය
අකේන්‍යා සුමිත්ගේ එකම දියණිය බව සුමිත්ට මතක් වූයේ ඇයට වයස අවුරුදු විසි හතර සම්පූර්ණ වූවාටත් පසුව ය..ඒ ඔහුගේ ව්‍යාපාරික මිත්‍රයෙකු වූ ප්‍රසන්න වීරනායකගේ පුත් සහස් යුෂ්මන්ත වීරනායක අකේන්‍යාව විවාහ කරගැනීමට කැමැත්තෙන් සිටින බව දැනගැනීමෙනි..සුමිත්ගේ ව්‍යාපාර තව දුරටත් සාර්ථක කරගැනීමට මෙය අවස්ථාවක් කරගත් ඔහු කඩිමුඩියේ ම විවාහයට කටයුතු සූදානම් කළේ ය..කලකිරීමත් , පාළුවත් , තනිකමත් අකේන්‍යාව හතර අතින් වෙලාගෙන සිටි මොහොතක කිසිම දෙයක් ගැන කිසිම හැඟීමක් නොවූයෙන් අකේන්‍යා වැඩි ප්‍රශ්නයක් නොඅසා ම පියාගේ තීරණයට එකඟ විය..ආච්චී , සීයා හා තමාට බෙහෙවින් ලැදි වූ නිවසේ සේවක පිරිස අතහැර දමා යෑමට සිත තරමක් එකඟ නොවූවත් පියාගේ තීරණ හමුවේ තමා නිකම්ම නිකම් සෙල්ලම් බඩුවක් බව දැන සිටි නිසා ම ඈ කාලයට ඉඩ දී බලා සිටියා ය..අකේන්‍යාට වයස අවුරුදු විසි පහ සම්පූර්ණ වනවාත් සමග ම සහස් අකේන්‍යා අතිනත ගැනීමේ ඒ මහා මංගල්‍ය සුවිසල් අන්දමින් පැවැත්වුණේ ය..දියණියගේ පිටවීම සුජාතාගේ හොර පාරට තවත් අඩිතාලමක් විය
නමුත් වසරක තරම් කාලයක් වත් ඒ දීග කෑම සාර්ථක වූයේ නැත..සුජාතාගේ හා සුමිත්ගේ විවාහය පරිදි ම විවාහයක් එහි විය..සහස්ගේ කැමැත්තෙන් අකේන්‍යාව විවාහ කරගත් නමුත් සහස්ට හතර අතේ පෙම්වතියන් විය..ඇතැම් විටක සමහර පෙම්වතියක් අකේන්‍යාට දුරකථන ඇමතුම් ගෙන තර්ජනය කළා ය..තවත් එකෙක් දෙන්නෙක් නිවසට ම ගොස් අකේන්‍යා හා දබර කළා ය..සිදු වන දේට හේතු විමසූ විට සහස්ට ආරූඪ වන්නේ යකුන් සියයකගේ තරම් කෝපයකි..වසරකට ආසන්න කාලයක් සියල්ල උපේක්ෂාවෙන් දරා සිටි ඈ ඒ ගැන ආච්චී හා සීයා දැනුවත් කළ පසු ඩෙස්මන් නානායක්කාරගේ තීරණය පරිදි අකේන්‍යා නැවත නිවසට ගියා ය..එදින නානායක්කාර නිවසේ මහා යුද්ධයකි..කවදාකවත් නොවුණු අයුරින් එදින ඩෙස්මන් නානායක්කාර ; සුමිත් නානායක්කාරගේ පියා බවට ඔප්පු කළේ ය..සුමිත්ට ඩෙස්මන් හා කට ගහගෙන යාමට එවර ඩෙස්මන් ඉඩ තැබුවේ නැත..එදින සුමිත් තම පියා ඉදිරියේ පරාජය විය..සීයාගේ කටේ බලයෙන් අකේන්‍යාට නිවසට වී සිටීමට අවසරය සුමිත්ගෙන් ලැබුණි..සුජාතා සිටියේ අබ පුපුරන තරම් කෝපයෙනි
එදා පටන් අකේන්‍යා ඇගේ විවාහයට පෙර සුපුරුදු ජීවිතය ගත කරන්නට වූයේ තරමක සැනසිලිදායක සිතිනි..ආච්චිගේ හා සීයාගේ ඇස ගැටෙන මානයක සිටීමට හැකි වීම ඈට සහනයකි..සහස් අකේන්‍යා සොයා පැමිණියේ නැත..දුරකථන ඇමතුමකින් හෝ ඈ ගැන සොයා බැලුවේ ද නැත..ඉන් මත්තට අකේන්‍යා සහස්ව හිතින් ඉවත් කරගනිමින් සිටියා ය..වාසනාවකට ඔවුන් අතර නීත්‍යානුකූල විවාහයක් සිදු උනත් සහස්ගෙන් අකේන්‍යාගේ පතිවත් බිඳී තිබුණේ නැත..විවාහක වුවත් අකේන්‍යා තවමත් පිරිසිදු තරුණියක වූවා ය
අකේන්‍යා වැරැන්ඩාවට වෙලා නිදහසේ ගත කරන වෙලාවට ගෙදර කිසිම කෙනෙක් අකේන්‍යාට කන්න කන්න කතා කරලා වත් කරදර නොකරන්න වගබලා ගන්නවා..ඒත් හසිස්සියෙ ම මේ ධාරානිපාත වැස්ස වෙලාවේ අකේන්‍යාට මහ හයියෙන් කෑ ගහගෙන කලබලෙන් උඩු මහලට දුවගෙන ආවෙ ගෙදර කුස්සි අම්මා
❝ චූටි බේබී..චූටි බේ..බී...❞
❝ මොකද කුස්සෙ අම්මේ මේ කලබලේ..? ❞
❝ අ..අර..චූටි බේබිගෙ... ❞
❝ ඉස්සෙල්ලා හුස්ම අරන් ඉන්න..මොකද්ද ඔච්චරට ම වෙලා තියෙන්නෙ...? ❞
෴ මතුසම්බන්ධයි ෴
Ａｕｔｈｏｒ'ｓ Ｎｏｔｅ 🦋🖤💐
✦✧ ලොකූ කාලයක විවේකයකින් පස්සෙ නවකතාවක් ලියන්න හිතුවෙ..ඉස්සරහට කොටස් විදිහට ඔයාලට දිගටම අකේන්‍යාව කියවන්න පුලුවන්..අකේන්‍යාගෙ වසන්තේ මොන වගේ වෙයිද..? කුස්සි අම්මා දුවගෙන ආවෙ ඇයි දන්නෙ නෑ නේද..? හිතුන දේ comment කරගෙන යන්න..අඩුපාඩුත් කියන්න අනිවාරෙන් ම..ආදරෙයි හැමෝටම 😚💗🫂 ✧✦
.
.
.
.
.
#_Sandeepanie Manuweera ( brownie )
On 2025 / 03 / 29 ✍
